!! आमची नर्मदा परिक्रमा !! ( ४२)

 !! आमची नर्मदा परिक्रमा !! ( ४२)

     आमचा कालचा मुक्काम कोसरिया गावातील  नर्मदा मंदिरात झाला.आम्हाला टेमला गावी जायचे होते. संपूर्ण रस्ता चांगला असल्याने आम्ही सहा वाजता निघालो. विंध्यचल पर्वतरांग असल्याने सर्वत्र डोंगररांगा दिसत होत्या. सकाळी सकाळी ९ वाजताच उमरट गावात आलो. आमचे परिक्रमावासीबंधू पाठीमागे असल्याने कपडे धुण्याचा निर्णय घेतला. परिक्रमेत आपल्याजवळील वस्तू विसरणे हा एक प्रकार असतो. त्यामधून बहुतेक कोणाची सुटका होत नाही. लहान मोठी वस्तू कोठे ना कोठे विसरत असतेच. माझीही त्यातून सुटका झाली नाही.

           आम्ही टेमला गावी बारा वाजता पोहोचलो. तेथे पुरुषोत्तम राठोड गेले कित्येक वर्षे परिक्रमावासीयांना सेवा देत आहेत. किती मूर्ती (लोक ) आश्रमात भोजन प्रसादासाठी येणार याचा अंदाज व्हाट्सग्रुपच्या माध्यमातून त्यांना येत असतो. त्याप्रमाणे भोजन बनवले जाते. येथे भोजन प्रसाद तर घेतलाच तसेच दोन वाजेपर्यंत विश्रांती घेतली. 

           दुपारनंतरचा प्रवास फारच खडतर होता. दगडधोंड्यातून, डोंगर दऱ्यातून वाट तुडवत आम्ही कुलवट येथील हनुमान मंदिरात पोहोचलो. हे मंदिर नदीकाठी आहे. हा परिसर उत्तर तटावरील शूलपानीचा भाग आहे यामधून एकट्याने चालणे खूपच धोक्याचे आहे. आज आम्ही २७ किलोमीटर चाललो. पुढे निवासाची जवळपास सोय होणार नसेल तर चार वाजल्यानंतर लगेचच  थांबण्याचा निर्णय घ्यावा लागतो. उजेड आहे म्हणून चालता येत नाही.

         आज चाललेला सर्व परिसर आदिवासींचा आहे .त्यांचे लोकजीवन, संस्कृती, राहणीमान जवळून पाहता आले. घराचा परिसर स्वच्छ तर आहेच, भिंती कुडाच्या, काही ठिकाणी चांगली घरे असे स्वरुप आहे. घरासाठी पंतप्रधान आवास योजनेतून बऱ्याच लोकांना साह्य झालेले दिसत आहे. येथे शिक्षणाकडे फारसे लक्ष दिले जात नाही असे दिसते. एका आदिवासी वसतिगृहात गेलो. तेथे ५० विद्यार्थ्यांची क्षमता असताना केवळ १४ विद्यार्थी होते.याठिकाणी शाळेत रोज येजा करणे अवघड आहे त्यामुळे वसतिगृहात राहण्याशिवाय पर्याय नाही.

     आज एका गोष्टीने विशेष लक्ष वेधून घेतले. आम्ही ज्याठिकाणी मुक्कामाला थांबलो होतो तेथे सकाळी सहा वाजता घरातील गृहिणी दरवाज्याजवळ रांगोळी काढत होती. शिक्षण कमी असले तरी संस्कृती संवर्धनात आम्ही कोठेही कमी नाही हेच त्या गृहीनीने दाखवून दिले. आपण प्रत्येकाने संस्कृती संवर्धनासाठी प्रयत्न करावेत असे मला वाटते.

      राजेंद्र पवार 

 ९८५०७८११७८

#shivaputri #narmada #narmadaparikrama #narmadariver #नर्मदापरिक्रमा  #satara #satarakar