!! जावली जोडी रन !! (७ ऑगस्ट )

 

!! जावली जोडी रन !! (७ ऑगस्ट )

      आज जावली जोडी रनचे मेढा येथे आयोजन करण्यात आले होते. यामध्ये पुरुष-पुरुष, स्री-स्त्री किंवा पुरुष-स्त्री असे भाग घेऊ शकतात. आम्ही पुरुष-पुरुष अशा गटात भाग घेतला होता. यामध्येही
१८ वर्षाखालील,१९ ते ४९ चा वयोगट तर पुढचा गट ५०वर्षांपुढील होता. आमच्या वयानुसार आमचा समावेश ५० वर्षावरील गटात होता. माझेबरोबर कारंडवाडीचे कुमार मेढेकर होते. मी आज ही स्पर्धा ५४मिनिटे आणि ६ सेकंदात पूर्ण केली.
    स्पर्धेचा रुट कण्हेर धरणालगत असल्याने धावताना खूपच आनंददायी वाटत होते. रुट सपोर्ट छानच होता. जावली जोडी रन ही देशातील अशी पहिलीच स्पर्धा आहे. अशा स्पर्धेमुळे कुटुंबातील सदस्यांना व्यायामाची आवड निर्माण होते.
     इंग्रजीत "Sound mind in a sound body".असे म्हटले आहे. चला तर आपण सर्वजणच व्यायामाची कास
धरुया.
      राजेंद्र पवार
  ९८५०७८११७८

!! वारी पंढरीची २०२२ !! (दिवस चौथा २४ जून )

 !! वारी पंढरीची २०२२ !! (दिवस चौथा २४ जून )

           आज सकाळी ६ वाजता ज्ञानेश्वर महाराज पालखी सोहळ्याचे भवानी पेठेतील पालखी विठोबा मंदिरातून प्रस्थान झाले. आम्ही प्रस्थानापूर्वी तेथे हजर होतो. आम्ही लगेचच दिंडीत सहभागी झालो. कालच्या नियोजनाप्रमाणे पुलगेटजवळ शपथ घेण्याचा कार्यक्रम संतांच्या साक्षीने झाला.थोड्याच वेळात पालखी वानवडी जवळ आली. त्याठिकाणी परंपरागत आरती झाली. वारीत सर्वत्र टाळ मृदंगाचा गजर चालू असतो परंतु फक्त चोपदाराने दंड उंचावताच सर्वत्र शांतता प्रस्थापित होते. लाखोंचा जनसमुदाय एका क्षणात एकदम शांत होताना पाहिला. आज हडपसर, उरळी देवाची व झेंडेवाडी येथे छोटे विसावे होते. वडकीनाला याठिकाणी मोठा विसावा होता. वडकी नाल्यापासून दिवे घाट सुरु होतो. घाटात वारकऱ्यांची कसरत पाहायला मिळत होती. थोडासा ऊन सावलीचा खेळ चालू होता. 

             सगळे वारकरी पावसाची प्रतीक्षा करत होते पण पावसाने हुलकावनीच दिली. फक्त एका सरीने काय तो दिलासा दिला. पालखीच्या पुढे नगाऱ्याची गाडी असते. वारीत प्रत्येक दिंडीत हरिनामाचा गजर चाललेला दिसतो.दुपारनंतर आम्ही थोडं पुढे आल्याने प्रत्येक दिंडीमध्ये चालणाऱ्या भजनाचा आनंद लुटला. घाट चढून आल्यानंतर लगेचच फिजोथेरपीचे केंद्र होते. तेथे मसाजची सुविधा उपलब्ध करुन दिली होती. या सुविधेचा लाभ आम्ही घेतला. आजचा टप्पा ३५ किलोमीटरचा त्यातच अवघड घाट असल्याने प्रत्येकाच्या चेहऱ्यावर थकवा जाणवत होता याला फक्त तरुणांचा अपवाद असेल. पुरंदर तालुक्याच्या प्रवेशद्वारावर पांडुरंगाची मोठी मूर्ती असून ती लक्षवेधक होती. पुरंदर तालुक्याच्यावतीने सर्व वारकऱ्यांचे स्वागत केले जात होते. स्वागताचा मान विणेकऱ्याला दिला जातो.

            आज एकादशी असल्याने सर्वत्र फराळाचे वाटप केले जात होते. आज आम्हाला सकाळी वसंतदादा शुगर इन्स्टिट्यूटमध्ये कार्यरत असणारे ज्ञानेश्वर पवार यांच्याकडून फराळ मिळाला आणि याचवेळी मांजरी स्टड फार्ममध्ये कार्यरत असणारे मुख्य पशुवैद्यकीय अधिकारी डॉ.दत्तात्रय भोसले यांचे विशेष सहकार्य लाभले.

            वारीच्या मार्गावर जसे फराळाचे वाटप होते अगदी त्याचप्रमाणे ठिक ठिकाणी वैद्यकीय सुविधा मोफत उपलब्ध करुन दिली जात होती. मीही या सुविधेचा लाभ घेतला. आजचा आमचा मुक्काम सासवडनगरीत आहे. आज घाटात सर्वत्र वेगवेगळ्या वाहिन्या वारीचे चित्रीकरण केले जात होते. थोडक्यात काय तर खाजगी संस्था असो किंवा शासकीय या यंत्रणांच्या माध्यमातून लोकांपर्यंत जाता येते. मी म्हणेन वारी ही आपणास समाजसेवेची संधी देते. आपणास देखील अशा संधी आल्या तर त्या संधीचे सोने करायला हवे. आपलं कामसुध्दा  वारीच्या माध्यमातून समाजापुढे नेण्याची संधी मिळते असे मला वाटते.

   राजेंद्र पवार 

 ९८५०७८११७८

प्रांताधिकारी मिनाज मुल्ला साहेबांनी साजरा केला वडाचा वाढदिवस

 प्रांताधिकारी मिनाज मुल्ला साहेब यांनी साजरा केला वडाचा वाढदिवस 

वाढदिवस साजरा करणे हि नियमित आहेच, परंतु एका झाडाचा ते पण वडाचा वाढदिवस आणि तो पण प्रांताधिकारी यांनी साजरा करणे हे म्हणजे नवलच....

                कोविडने जगभरात थैमान घातले त्यामधून कोणाचीच सुटका झाली नाही. याच काळात  दत्तटेकडीवर वडाचा जन्म झाला. हो जन्मच झाला. हा वड निसर्गप्रेमी अशोकराव कणसे यांचे अपत्य आहे असे म्हटले तरी वावगे ठरणार नाही. आपण आपल्या बाळाला कडेवर, खांद्यावर खेळवतो, बापूंनी या वडाला चक्क डोक्यावर घेतले आणि टेकडीवर आणले त्याचा मी स्वतः साक्षीदार आहे. १९ मे २०२० ला या वडाचे रोपण करण्यात आले.गतवर्षी या वडाचा वाढदिवस मोठ्या इतमामाने करण्यात आला. या वडाकडे बापूंच्या प्रमाणे संपूर्ण पंचक्रोशीचे लक्ष आहे. या वडामुळे अभयवन सामाजिक संस्था उदयास आली. मला वाटते वर्णे, अंगापूर, धोंडेवाडी, फत्यापूर, खोजेवाडीचा डोंगर परिसर हिरवागार करण्याचे नेतृत्व हा वडच करत आहे. हा परिसर हिरवागार करण्यासाठी, त्यांना पाणी उपलब्ध व्हावे यासाठी श्री काळभैरवनाथ देवस्थान ट्रस्ट, वर्णे -आबापुरी तसेच ग्रामस्थांनी  मोठे सहकार्य केले आहे.

                आजच्या दिवशी वडाच्या झाडाला जमिनीत पुनर्लागवड करून दोन वर्ष पूर्ण झाली. या वडाने या एका ओसाड टेकडीवर एकट्याने दोन वर्ष उन, वारा, पाऊस झेलून तो मी इथे कायम उभा राहीन अशी साक्ष देत असल्यासारखा एकटा आपली मुळे घट्ट रोवून दिमाखात उभा आहे. या वडास दोन वर्ष पूर्ण झाली त्यानिमित्त वडाचा वाढदिवस साजरा करण्यासाठी प्रांताधिकारी मिनाज मुल्ला साहेब, माजी सैनिक गणेश शेडगे, डॉ माणिक काका शेडगे, वडाचा वाढदिवस साजरा करण्यासाठी नागठाणे हून आलेले कपिल साळुंखे, मधुकर खुळे आणि त्यांचे कुटुंबीय, आपल्या गावातील राहुल काळंगे, सुजित काळंगे, वैभव पवार तसेच या पंचक्रोशी मधील टेकडीवरच्या वडावर प्रेम करणारे निसर्गप्रेमी या वाढदिवसाच्या कार्यक्रमास उपस्थित होते.

               या वडाच्या झाडापासून सुरु झालेले अभयवन संस्थेने केलेले कार्य सर्वांपर्यंत पोचावे यासाठी स्मरणिका तयार करून त्याचे वाटप करण्यात आले. अभयवनाच्या प्रत्येक कार्यात सहभागी असणारे परंतु आता आपल्यात नसणारे श्रीमंत काळंगे साहेब यांना यावेळी श्रद्धांजली वाहण्यात आली. 

चला आपण सर्वजन आपल्या जवळच्या असणाऱ्या ओसाड टेकड्या हिरव्यागार करण्यासाठी प्रयत्न करूया. 

 राजेंद्र पवार 

मोबा- ९८५०७८११७८