वयाच्या ६४ व्या वर्षी पहिला क्रमांक २१ किलोमीटर !! शहीद मॅरेथॉन सांगली !! (२६ मार्च )

 !! शहीद मॅरेथॉन सांगली !! (२६ मार्च )

          

 सांगलीची शहीद मॅरेथॉन ही शहिदांना अभिवादन करणारी भारतातील एकमेव मॅरेथॉन होय. स्व.अशोक कामटे एडीशनल पोलीस कमिशनर यांच्या स्मृतिप्रीत्यर्थ या मरेथॉनचे आयोजन करण्यात येते. सांगली येथे ५ किलोमीटरची  फन रन व २१ किलोमीटरची हाफ मॅरेथॉन आयोजित करण्यात आली होती.

         मी २१ किलोमीटरमध्ये सहभाग घेतला होता.आज मी ही स्पर्धा  १.४३.५२(एक तास त्रेचाळीस मिनिटे आणि बावन्न सेकंदात ) पूर्ण केली. ६० वर्षावरील  वयोगटात माझा पहिला क्रमांक आला.

      आयुष्यातील सर्वात कमी वेळात पूर्ण केलेली ही हाफ मॅरेथॉन ठरली, त्यामुळे आजचा आनंद अवर्णनीय आहे. माझ्यासह स्वास्थम फिटनेस क्लबचे मच्छिन्द्र फडतरे, दीपक राजे, आनंदराव जाधव, डॉ. दयानंद घाडगे, संतोष कणसे , संदीप शिंदे, डॉ.अमोल पवार, डॉ. अतुल लिपारे, अविनाश सुतार यांच्यासह अनेक धावपट्टूनी  या स्पर्धेत भाग  घेतला होता. प्रचंड ऊर्जा स्रोत असणारे माझे स्नेही विशाल घोरपडे मला प्रेरणा देण्यासाठी  खास आले होते. आज दोघे एकत्रच धावलो. आज कमीतकमी वेळात शर्यत पूर्ण करण्याचे श्रेय विशाल घोरपडे यांनाच जाते.

         आजचा शर्यतीचा बराचसा मार्ग सपाट असल्याने धावण्याचा जोश वेगळाच होता. मार्गावर कृष्णा नदीवर ब्रिटिशकालीन आयर्वीन पूल, गणपती मंदिर अशी ऐतिहासिक ठिकाणे होती. रुट सपोर्ट अतिशय उत्साहवर्धक होता. राज्यातील स्पर्धकांबरोबर सांगलीमधील आबालवृद्धांनीही यामध्ये  मोठ्या संख्येने भाग घेतला होता.मार्गावरील वाद्य वृंद स्पर्धकांच्यामध्ये जोश निर्माण करत होता.

         ही स्पर्धा सकाळी ५:४५ ला  सुनील पवार आयुक्त सांगली -मिरज- कुपवाड  महानगरपालिका ,मा.बापू बांगर जिल्हा पोलीस उपअधीक्षक सातारा  यांच्यासह अन्य मान्यवरांच्या शुभहस्ते फ्लॅग ऑफ करून सुरु झाली .फ्लॅग ऑफ करण्यापूर्वी राष्ट्रगीत "जनगणमन" झाले. राष्ट्रगीताने वातावरण राष्ट्रभक्तीमय झाले होते. सर्वत्र "भारत माता की जय " चा नारा घुमला होता.

  नियमित सराव, प्रबळ इच्छाशक्ती असेल तर यश खेचून आणता येते हेच आजच्या मॅरेथॉनने दाखवून दिले. आपण एखाद्या क्षेत्रात यशोशिखरावर पोहचण्या साठी आवश्यक तो सराव करावा. आपण इच्छाशक्तीच्या जोरावर यशाची शिखरे पादाक्रांत करावीत असे मला वाटते.

        राजेंद्र पवार

   ९८५०७८११७८

आयुष्यातील पहिली सर्वात खडतर मॅरेथॉन ५३ किलोमीटर ११ तास ७ मिनिटात पूर्ण ......

 !! सिंहगड, राजगड, तोरणा अल्ट्रा मॅरेथॉन पुणे !! (SRT ULTRA MARATHON, PUNE )

                   (१० डिसेंबर )

                हिंदवी स्वराज्याचे संस्थापक, रयतेचे राजे,अखिल भारतीयांचे प्रेरणास्थान छत्रपती शिवाजी महाराज यांना अभिवादन करण्यासाठी सदरच्या मॅरेथॉनचे आयोजन करण्यात आले होते. थोडक्यात ही पाचवी मॅरेथॉन छत्रपती शिवरायांना समर्पित केलेली होती.

                  सदरच्या मॅरेथॉनमध्ये  वेस्टर्न घाट रनींग फौंडेशन,महाराष्ट्र राज्य पर्यटन विकास महामंडळ, वन विभाग पुणे, पुणे ग्रामीण पोलीस, हवेली, भोर, वेल्हे, मुळशी या तालुक्यातील जनता त्याचबरोबर घेरा सिंहगड वनसमिती यांचा महत्वपूर्ण वाटा आहे.  ही रन ११कि. मी.,२५  कि. मी. व ५३ कि. मी. अशी होती. मी ५३ कि. मी.मध्ये भाग घेतला होता. हे अंतर पाऊल वाटेने पूर्ण करावयाचे असल्याने शर्यत पूर्ण करण्याचा कालावधी १२ तासाचा होता. मी हे अंतर ११:०७:३२( अकरा तास सात मिनिटे आणि बत्तीस सेकंद )   एवढया वेळेत पूर्ण केले. एवढया मोठ्या स्पर्धेत भाग घेण्याची आयुष्यातील पहिलीच वेळ होय. ही स्पर्धा अतिशय अवघड होती. सिंहगड, राजगड व तोरणा किल्ला चढणे- उतरणे,अगदी कसोटी होती.आपणा सर्वांच्या शुभेच्छामुळे कसोटीस उतरु शकलो असे वाटते. ५३ कि. मी.नाव नोंदणी केलेल्या ३०० पैकी साधारण १०० लोकांनी ही शर्यत पूर्ण केली असावी.

         आज माझ्याबरोबर माझे बंधू डॉ. दत्तात्रय भोसले, आर्किटेक्ट रामदास लावंड, गुणवंत गायकवाड,  सेल्स टॅक्स इन्स्पेक्टर सुनिल मांढरे आणि आपल्या गावचे चंद्रकांत काळंगे सहभागी झाले होते.  ही शर्यत पार करत असताना सगळा जंगलातील रस्ता, बऱ्याच ठिकाणी चढण्या-उतरण्यासाठी दोर बांधलेले,काही ठिकाणी रेलिंग तर काही ठिकाणी शिढ्या होत्या. काही ठिकाणी बसूनच उतरावे लागत होते. शर्यतीचा शेवटचा टप्पा खूपच अवघड होता. माझ्या आयुष्यात पहिल्यांदाच एका दिवसात तीन किल्ल्यावर जाण्याचा योग आला. मार्गावर रुट सपोर्ट छान होता.

               या ५३ किलोमीटर शर्यतीमध्ये निसर्गाचा अनोखा नजराणा पाहायला मिळाला आहे. यामध्ये प्रामुख्याने भातशेतीचा खोडवा,त्याची बुचाडे, भाजीपाला, सह्याद्रीची  पर्वतरांग, नद्या,धरणे, जंगली फळे, फुले, विविध प्राणी, सह्याद्रीचा पश्चिम घाट, जागतिक वारसा स्थळ म्हणून येथील जैव विविधता पाहण्याची संधी मिळाली.

  थोडंस गडाविषयी.....

सिंहगड : सिंहगडाचे मूळ गाव कोंढाणा होते. शिवाजी महाराजांचे विश्वासू सहकारी सरदार तानाजी मालुसरे आणि त्यांच्या मावळ्यांनी हा किल्ला जिंकला परंतु या लढाईत तानाजींना वीर मरण आले. प्राणांचे बलिदान देऊन हा किल्ला जिंकल्यामुळे शिवाजी महाराजांनी " गड आला पण सिंह गेला" हे वाक्य उच्चारले,त्यानंतर सिंहगड हे नाव रुढ झाले.

 राजगड :या किल्ल्यावर छत्रपती शिवाजी महाराजांच्या मराठी साम्राज्याची पहिली राजधानी होती. शिवाजी महाराजांचे धाकटे चिरंजीव राजाराम महाराज यांचा जन्म या गडावर झाला तसेच महाराणी सईबाईंचे निधनही येथेच झाले आहे. बुलंद, बळकट राजगड आजही हिंदवी स्वराज्याची ग्वाही देत आहे.

तोरणा : छत्रपती शिवाजी महाराजांनी स्वराज्य स्थापनेच्या सुरुवातीच्या काळात जे किल्ले घेतले त्यामधील एक म्हणजे तोरणा किल्ला. या किल्ल्याला स्वराज्याचा शिलेदार म्हणून ओळखले जाते कारण छत्रपती शिवाजी महाराजांनी आपल्या सोबत्या सोबत आणि मावळ्या सोबत रायरेश्वर मंदिरामध्ये स्वराज्याची स्थापना करण्याची शपथ घेतल्यानंतर त्यांनी पहिल्यांदा तोरणा हा किल्ला जिंकला आणि स्वराज्याचे तोरण बांधले.

              या शर्यतीच्या निमित्ताने एवढेच  सांगावेसे वाटते की,आपणही व्यायामाचा सराव करावा, अशा शर्यतीत भाग घ्यावा, स्वतःला तंदुरुस्त ठेवावे.चला तर आपण सर्वजण व्यायामाची कास धरुया,स्वतःला निरोगी ठेवूया.

            राजेंद्र पवार

     ९८५०७८११७८

५५ वर्षावरील वयोगटात पहिला नंबर !! गरवारे वाई हाफ मॅरेथॉन !! (२० नोव्हेंबर )

 !! गरवारे वाई हाफ मॅरेथॉन !! (२० नोव्हेंबर ) ५५ वर्षावरील वयोगटात पहिला नंबर 

             आज २० नोव्हेंबर, टीम वाई स्पोर्ट्स फौंडेशनने गरवारे वाई हाफ मॅरेथॉनचे आयोजन केले होते. आज मी २१ कि. मी. हाफ मॅरेथॉनमध्ये भाग घेतला होता. आज मी ही स्पर्धा  १:५३:०६ (एक तास त्रेपन्न मिनिटे आणि सहा सेकंदात) पूर्ण केली. माझा ५५ वर्षावरील वयोगटात प्रथम क्रमांक आला. स्पोर्ट्स फौंडेशनच्या वतीने सन्मान चिन्ह, पदक आणि रोख रक्कम बक्षीस म्हणून देण्यात आली.

            आज माझ्याबरोबर वर्णे येथील बाळासाहेब साळुंखे, माझे बंधू डॉ. दत्तात्रय भोसले, भाचे श्रीकांत घोरपडे, नागठाण्याचे मधुकर खुळे यांनीही स्पर्धेत भाग घेतला होता. वाई स्पोर्ट्स फौंडेशनने "फिट इंडिया, हिट इंडिया" ही देशव्यापी थीम घेतली होती. यामागे आरोग्यदायी चळवळ अधिक गतिमान  करणे हाच मुख्य उद्देश होता.

            आजच्या स्पर्धेचा प्रारंभ द्रविड हायस्कूल मैदानावरून सकाळी ६:१५ वाजता झाला. स्पर्धेचा प्रारंभ गरवारे ग्रुपचे विवेक कुलकर्णी, वैभव जोशी, टीम वाई स्पोर्ट फाउंडेशनचे अध्यक्ष दीपक ओसवाल, रेस डायरेक्ट राजगुरू कोचले सर, गंधर्व रिसॉर्टचे सारंग फरांदे, निखिल फरांदे यांच्या शुभहस्ते हिरवा झेंडा दाखवून करण्यात आला. स्पर्धेचा मार्ग महागणपती पूल, गंगापुरी, मेणवली भोगाव, वरखडवाडी, धोम, शिंदेवाडी असा होता.आजचा रूट सपोर्ट खूपच छान होता. ठिकठिकाणी वाद्यांच्या गजरात स्पर्धकांना प्रोत्साहित केले जात होते. एनर्जी फूडची व्यवस्था जागोजागी होती. धावण्यासाठी अतिशय आल्हाददायक वातावरण असल्याने मला ही स्पर्धा कमी वेळात पूर्ण करता आली.

         मुख्य बक्षीस वितरण कार्यक्रमानंतर, वाईमधील ज्ञानदीप इंग्लिश मिडियम स्कुलचे चेअरमन दिलीप चव्हाण, उत्कर्ष सह. पतसंस्थेचे मुख्य कार्यकारी अधिकारी प्रकाश पवार, डॉ. मोहन सोनवणे, जयदीप कांबळे, अथर्व पवार, दादासाहेब काळे, प्रितम भूतकर आणि यश सोनवणे या मित्र परिवाराच्यावतीने माझा सत्कार करण्यात आला. 

        आरोग्य चळवळ अधिक गतिमान करण्यासाठी आपण सर्वांनीच व्यायाम करायला हवा असे मला वाटते.

             राजेंद्र पवार

         ९८५०७८११७८

!! सातारा मास मॅरेथॉन !!(२ ऑक्टोबर ) पंचावन्न वर्षांपुढील गटात प्रथम क्रमांक

 !!  सातारा मास मॅरेथॉन !!(२ ऑक्टोबर )

             आज २ ऑक्टोबर, गांधी जयंती, जागतिक अहिंसा दिन या दिवसाचे औचित्य साधून मॅनुफॅक्चर्स असोसिएशन सातारा (मास) यांनी प्रथमच मॅरेथॉनचे आयोजन केले होते. या स्पर्धेचे घोषवाक्य "रन फॉर हेल्थ " असे होते. औद्योगिक क्षेत्रात काम करणाऱ्या नागरिकांमध्ये फिटनेस जागरुकता निर्माण होऊन सशक्तीकरण व्हावे, जागतिक तापमानवाढ रोखणे व पर्यावरण संरक्षण याबाबत जागृती करण्यासाठी या मॅरेथॉनचे आयोजन करण्यात आले होते. 

             या स्पर्धेचे मुख्य प्रायोजक "टॉप गिअर  ट्रान्सन्मिशन" असून जोशी जम्पाला प्रा. लिमिटेड,उत्कर्ष  फ्लेक्सिबल कपलिंग हे सह प्रायोजक होते.या स्पर्धेचा शुभारंभ एम.आय.डी.सी.चे अधिक्षक अभियंता  राजेंद्र गावडे यांचे शुभहस्ते झाला.

       या स्पर्धा ११ कि. मी.व ५ कि. मी. अशा होत्या. मी ११ कि. मी.मध्ये भाग घेतला होता. आज मी ही स्पर्धा ५६:४५ (छपन्न मिनिटे आणि पंचेचाळीस सेकंदात ) पूर्ण केली. आज माझा पंचावन्न वर्षांपुढील गटात प्रथम क्रमांक आला. टॉप गिअरचे कार्यकारी संचालक, जिल्हा पोलीस अधीक्षक अजयकुमार बन्सल यांच्या शुभहस्ते ट्रॉफी, रोख बक्षीस, मेडल  देऊन गौरविण्यात आले. माझ्याबरोबर आमचे चिरंजीव डॉ. श्रीधर, भाचे श्रीकांत घोरपडे हेही सहभागी झाले होते.        

            आपल्या गावातील २५ मुलांनी या स्पर्धेत भाग घेतला होता. या सर्वांचेच प्रायोजकत्व श्रीकांत पवार यांनी स्वीकारले होते. या स्पर्धकाशिवाय टॉप गिअर परिवारातील शंभरपेक्षा अधिक  जणांनी या मॅरेथॉनमध्ये भाग घेतला होता. स्पर्धा संयोजनात मासचे अध्यक्ष राजेंद्र मोहिते आणि मास स्पोर्ट कमिटीचे चेअरमन श्रीकांत तोडकर यांनी महत्वपूर्ण भूमिका बजावली.

         

आपण सर्वजणच फिटनेसबाबत जागरुक राहूया त्याचबरोबर जागतिक तापमानवाढ रोखणे, पर्यावरण संरक्षण मोहिमेत सहभागी होऊया.

            राजेंद्र पवार 

           ९८५०७८११७८

!! सातारा हिल हाफ मॅरेथॉन !! 2022

 !! सातारा हिल हाफ मॅरेथॉन !!

           आज सातारा हिल हाफ मॅरेथॉन स्पर्धा संपन्न झाली. त्यामध्ये मी भाग घेतला होता. ही स्पर्धा पूर्ण करण्यासाठी मला ०२:०१:१६ दोन तास एक मिनिट १६ सेकंद  एवढा वेळ लागला. माझे यापूर्वीचे रेकार्ड मोडल्याचा विशेष आनंद झाला. पूर्वीपेक्षा मला ११ मिनिटे कमी वेळ लागला. आज माझ्याबरोबर आमचे डॉ. श्रीधर यांनीही भाग घेतला होता.

          

         ही स्पर्धा सातारा हिल रनर्स फौंडेशननी आयोजित केली होती. मॅरेथॉनची सुरुवात साताऱ्याचे जिल्हाधिकारी रुचेश जयवंशी व जिल्हा पोलिस प्रमुख अजयकुमार बन्सल यांनी हिरवा झेंडा दाखवून केली. 

            या स्पर्धेसाठी रुट सपोर्ट छानच होता. ठीकठिकाणी वाद्यवृंद होते.मार्गावर बऱ्याच ठिकाणी पाणी, लेमन ज्युस, चिक्कीची व्यवस्था होती. रनर्सना त्रास झाला तर अंबुलन्सची व्यवस्था होती. एकंदरीत आजची स्पर्धा खूपच छान झाली. आपलं आरोग्य चांगले राहावे यासाठी चालणे, धावणेचा व्यायाम करणे आवश्यक आहे असे मला वाटते.

    राजेंद्र पवार

   ९८५०७८११७८