!! रमेश मंत्री स्मृतिदिन !! (१९ जून )
प्रवासवर्णनकार कथाकार विनोदी लेखक म्हणून प्रसिद्ध असलेले महाराष्ट्रातले एक सारस्वत रमेश मंत्री.
रमेश मंत्री यांचा जन्म ६ जानेवारी १९२५ रोजी कोकणातील कुडाळ जवळच्या झाराप या गावी झाला. रमेश मंत्री हे मूळचे कुळकर कुटुंबातले. त्यांचे मूळ नाव रमेश शंकर कुळकर परंतु मंत्री घराण्यात दत्तक गेल्यामुळे रमेश राजाराम मंत्री असे त्यांचे नामांतर झाले. त्यांचे संपूर्ण शिक्षण कोल्हापूर येथे झाले. एम. ए. चा अभ्यासक्रम सुरू असताना स्थानिक वृत्तपत्रातून ते लिखाण करू लागले त्यानंतर पुढारी या दैनिकात त्यांनी सहसंपादक म्हणून काही दिवस काम केले.
वृत्तपत्रव्यवसायाचे शिक्षण घेण्यासाठी ते इंग्लंडला गेले. १९५८ ते ७८ या काळात ते अमेरिकन सरकारच्या माहिती खात्यात अधिकारी म्हणून कार्यरत होते. त्यामुळे सहाजिकच जगभर त्यांनी भरपूर प्रवास केला. या प्रवासातून विविध प्रकारचे अनुभव घेत घेत लेखनासाठी आवश्यक असलेली एक समृद्ध पार्श्वभूमी त्यांच्याजवळ निर्माण झाली आणि त्यातूनच मुळातच प्रतिभासंपन्न साहित्य निर्मिती केली.
रमेश मंत्री यांनी विपुल लेखन केले आहे. त्यांची १०० पेक्षा जास्त पुस्तके प्रकाशित झालेली आहेत. ‘थंडीचे दिवस’, ‘सुखाचे दिवस’, ‘नऊरंग’ इत्यादी त्यांची प्रवास वर्णने अतिशय वैशिष्ट्यपूर्ण ठरली. आणि वाचकांच्या पसंतीस उतरली. त्यांनी प्रचंड लेखन केले. १९७९ च्या एकाच वर्षात त्यांची ३४ पुस्तके प्रकाशित झाली. इतक्या संख्येने पुस्तके प्रकाशित होण्याचा विक्रम त्यांच्या नावावर आहे. प्रवास वर्णन जशी मंत्री यांनी लिहिली तसेच साहित्याचे अनेक प्रकार त्यांनी हाताळले त्यापैकी ‘करमणूकप्रधान’ असे विनोदी लेखन त्यांनी बरेच केले.
१९९१ साली भरलेल्या अखिल भारतीय मराठी साहित्य संमेलनाचे अध्यक्षपदही त्यांनी भूषवले.
लेखनाच्या विक्रमाची नोंद असलेल्या या साहित्यिकाचे १९ जून १९९८ रोजी निधन झाले. त्यांच्या पवित्र स्मृतीस विनम्र अभिवादन.
संदर्भ: मराठी सृष्टी डॉट कॉम
संकलक: राजेंद्र पवार
९८५०७८११७८
कोणत्याही टिप्पण्‍या नाहीत:
टिप्पणी पोस्ट करा