!! वारी पंढरीची २०२३ !! ( २७ जून )

 !! वारी पंढरीची २०२३ !! ( २७ जून )

   आमचा २६ चा रात्रीचा मुक्काम भंडी शेगाव येथील ज्ञानेश्वर यलमार यांच्या घरी होता. तिथीनुसार पालखीच्या आगमनादिवशी ज्ञानेश्वरचा वाढदिवस साजरा केला जातो,आम्ही सर्वांनी वाढदिवस उत्साहात साजरा केला. आज पालखीचे प्रस्थान दुपारी एक वाजता असल्याने सकाळचे स्नेहभोजन (प्रसाद ) भंडी शेगाव येथे घेतले. आजच्या प्रसादाचे नियोजन  ज्ञानदीप सहकारी पतसंस्था, शाखा पंढरपूर यांनी केले होते.आज आम्ही दीड वाजता पालखी सोहळ्यात सहभागी झालो. सर्वत्र पालखी मार्गावर ज्ञानबा तुकारामाचा जयघोष  ऐकायला मिळत होता.आज मार्गावर दोन रिंगणे झाली.

              पहिले उभे रिंगण तर दुसरे गोल रिंगण, गोल रिंगण बाजीरावाच्या विहिरीजवळ झाले. रिंगणात दोन अश्व धावत असतात पैकी एका अश्वावर माऊली आरुढ झालेल्या असतात असे मानले जाते. गोल रिंगणसोहळा खूपच लक्षवेधक होता. वारकऱ्यांनी खेळाचा मनमुराद आनंद लुटला. वारकऱ्यांना खरतर पावसाची प्रतिक्षा होती.पण आजपर्यंततरी नाराजच केले आहे.

      पालखी सोहळ्यात चालत असताना वारकऱ्यांना खूप त्रासाला सामोरे जावे लागते. जागा मिळेल तिथे राहावे लागते. वेळीअवेळी जेवण करावे लागते. ऊन पाऊस असा सामना करावा लागतो.या सर्व बाबींमुळे प्रकृतीच्या तक्रारी वाढतात. वारकऱ्यांची सेवा करण्यासाठी अनेक मेडिकल कॅम्प आयोजित केले जातात. अशाच  वैष्णव चॅरिटेबल व मेडिकल ट्रस्ट मुंबईच्या मोफत वैद्यकीय सेवा केंद्राला भेट देण्याचा आज योग आला.

        वैष्णव चॅरिटेबल ट्रस्ट गेले तीस वर्षे वारकऱ्यांना सेवा देत आहे."जेका रंजले गांजले, त्यासी म्हणे जो आपुले" याचा प्रत्यय आज आला. वैष्णव चॅरिटेबल ट्रस्ट ज्ञानेश्वर माऊली, सोपानकाका, तुकाराम महाराज या पालखी सोहळ्यासाठी सेवा देत असतात. याशिवाय महालक्ष्मी मंदिर, मुंबादेवी, सिद्धिविनायक मंदिरात वेळीवेळी सेवा देतात.

      

                या चॅरिटेबल ट्रस्टच्या व्यवस्थापनाची जबाबदारी विजय कासूर्डे यांच्यावर आहे. यावेळी डॉ. सुधीर करपे, डॉ. प्रमोद इंगळे, डॉ. विजय घुटूगडे, डॉ.  अरुण काळे, डॉ. नरेंद्र कदम, डॉ.रॉय पाटणकर, डॉ.रमेश चौधरी, डॉ. हळूरकर,डॉ. सौ. हळूरकर हे सेवा देताना दिसून आले. रुग्णांची तर खूप गर्दी होती.

             वारकऱ्यांची सेवा हीच खऱ्या अर्थाने पांडुरंगाची सेवा होय. "जनसेवा हीच खरी ईश्वरसेवा होय". असे म्हटले जाते. आपणही समाजातील गरीब, गरजूना मदत करायला हवी असे वाटते.

    राजेंद्र पवार

   ९८५०७८११७८

!! वारी पंढरीची २०२३ !!

           

 राम कृष्ण हरी, दिनांक ११ जूनला आळंदीहून ज्ञानेश्वर माऊलीच्या पालखी सोहळ्याचे प्रस्थान झाले. यावर्षी इच्छा असूनदेखील शिवकृपा पतपेढीच्या निवडणुकीमुळे पालखी सोहळ्याचा सुरुवातीपासून आनंद लुटता आला नाही. आज २६ जूनपासून मात्र आम्ही माळशिरस तालुक्यातील वेळापूरहून पालखी सोहळ्यात सहभागी झालो. काल रात्री आमच्या मुक्कामाची सोय  शिवकृपाच्या माळशिरस शाखेतील शाखाप्रमुख भरत जगदाळे यांनी आपल्या बंधूच्या घरी केली होती.

           आज पालखीचे प्रस्थान सकाळी सहा वाजता झाले. आम्ही रथापुढील दिंडी क्रमांक तीनमध्ये चालत आहोत. सकाळी साडेआठच्या दरम्यान उघडेवाडी येथील गोल रिंगण असणाऱ्या ठिकाणी पोहोचलो. रिंगणात दोन अश्व धावत असतात. एका अश्वावर  शितोळे सरकारांचे प्रतिनिधी आरुढ होतात तर त्यापाठीमागे माऊलींचा अश्व धावत असतो. दोन्ही अश्व धावत असताना सर्व वारकरी "माऊली, माऊली"असा गजर करत होते. अश्व धावलेल्या जागची माती आपल्या कपाळी वारकरी लावत होते.या गोल रिंगणानंतर सकाळचा विसावा झाला.या विसाव्यानंतर थोड्याच वेळात तोंडले - बोंडले ही गावे आली. तोंडले गावी विसाव्याच्या ठिकाणी एक पोलीस ड्युटीवर असताना टाल मृदंगाच्या तालात तल्लीन असताना दिसून आले. आपले कर्तव्य बजावत असतानादेखील नामस्मरण करता येते हेच  या पोलिसाने दाखवून दिले. तोंडले या गावातूनच एक ओढा वाहतो त्यास नंदाचा ओढा म्हटले जाते. येत पूर्वी ज्ञानेश्वर माऊली, सोपान, मुक्ताबाई, निवृत्तीनाथ येथे स्नान करताना एकमेकांना चिंब करत, आज परिस्थिती बदलली आहे.ओढ्यावर पुल झाला आहे.मात्र शावरच्या साह्याने वारकऱ्यांच्या अंगावर पाणी उडवले जाते.  मात्र जुना फिल काही येत नाही.तोंडले गावी ज्ञानेश्वर माऊली व तुकाराम महाराजांच्या पालख्या एकत्र येतात. इतकेच नव्हे तर दुपारनंतर सोपानकाका व ज्ञानेश्वर माऊलींच्या  पालख्याच्या भेटी होतात. ही भेट बंधू भेट म्हणून प्रसिध्द आहे. 

       आज आपण अनेक भावाभावामध्ये सख्य नसल्याचे पाहतो पण आजचा बंधू भेटीचा सोहळा पाहिल्यानंतर दोन बंधूमधील सबंध कसे असावेत हेच स्पष्ट होते. आपण प्रत्येकाने बंधूभाव वाढीसाठी प्रयत्न करावेत असे वाटते. 

        राजेंद्र पवार

 ९८५०७८११७८